موضوع و رد..................

[drrasha]

السلام عليكم ورحمة الله
الموضوع منقول من مدونة مين اللى فى الحياه مرتاح

اخوانى واخواتى ...... مرتادى مدونة مين اللى فى الحياة مرتاح نفيدكم علنا بان الموضوع دة هيكون فية ضرب نااار فعليكم بالصبر والصدق مع النفس ولبس خوذة الحياء فبالله عليكم محدش يزعل..... واسمعوها منى كلمة .....وما تستهونوش بواحدة صغيرة زى حالاتى ..... انا جاية احكيلكوا حكايات كل يوم بنسمع عنها ومش واخدين بالنا منها ولا مدركين اثرها على نفسنا وعلاقتنا بربنا وبالحياة حوالينا والمستقبل اللى بيستنانا .

الحكايات دى حصلت مع بنات اتمدنوا زينا ودخلوا ع النت ... وشباب كمان كان الجدع من دول يدخل ع النت وقلبة بيدق وبيدعى ربنا... يارب الاقى حبيبتى اون لاين ...قصدى اختى اون لاين.

تعالوا بقى نشوف السيناريوهات اللى بيعملوها الشباب ع البنات والبنات ع الشباب اون لاين ونشوف اية اخرة اللى بيحصل .

يفتح الستار

الشاب من دول يدخل المنتديات او(المدونات) ويكتب قال الله وقال الرسول واختى الفاضلة ... واختى الكريمة واحنا بقى يابنات نشتغل جزاك الله خيرا يا اخى ، جعلة الله فى ميزان حسناتك .

شوية وينشن اخونا على واحدة حسب مزاجة بقى ...فيـه الرقيقة وفيـه المشاغبة وفى الحنينة ! وفيـه الجامدة قوى واللى يحب يتحدى نفسة ويسيطر على مشاعر النوع الاخير دة من البنات يبدا برسائل خاصة للبنوتة دى .

والله دى وصلة موضوع ليا ابقى سعيد لو علقتى علية يا اختى الفاضلة .

شوية... ونلاقى البنت دايرة ورا مواضيعة وبتتابع كل نفس لية ...ماهو متدييييييين بقى وعارف ربنا .

شوية ويقولها دة اميلى يااختى لو تحبى تضيفينى على الماسينجر ونكمل حديثنا عن الموضوعات الدينية والفكرية اللى بطرحها .

وهنا بقى لو فرضنا ان البنت دى من البنات اللى ماسكين نفسهم شوية وقالتلة : انا مستحرمة اتكلم ع الماسنجر وكدة.

يبدا بقى السيد الحاج المتأبلس باقناعها كالتالى : يعنى ما كلامنا ع المنتديات زى الماسنجر برضة ... وانا روحت دار الافتاء بنفسى وقالولى مادام الكلام محترم والحديث عادى ولا يتطرق الى كلام رومانسى او على الحياة الشخصية خلاص مش حرام !!

تقوم البنت تصدقة .. وطبعا الدنيا فى النت ضلمة وكلامة جاى على هواها وهى بتتكلم من الاخر وعايزة تكلمة .

ويبدا الكلام ..... الاول يكون بالالقاب اختى الفاضلة ، اخى الفاضل ويكون الكلام اية رايك فى الموضوع الفلانى والراى العلانى.

وبعدين اخونا يدخل للغلبانة بالنحنحة ...انا النهاردة مخنوق ومش قادر اتكلم ....تعبان فى حياتى وانا اخويا مات وانا صغير وحاسس بالحرمان بعدية وماليش حد اشتكيلة وافضفضلة!

تقوم تبدا البنية تحن بقى وتواسية .... معلش يافلان ربنا يصبرك ...طب لعلمك بقى انا كمان حصلى استبحس فى قفايا وانا صغيرة والدكاترة لغاية دلوقت مش لا قيين لـه دوا.

وخطوة بخطوة تتشال الالقاب وندخل فى الحياة الشخصية احكيلك وتحكيلى ...اقولك وتقولى .وان والله ارتحتلك .ربنا يكرمك ويجعلة فى ميزان حسناتك وبعدين!!يقولها اية بصوا بقى وركزوا كويس فى الكلمة دى "انى احبك فى الله"

هههههههههه
شايفين اللعب على اصولة ...طبعا ماهو الاخ ملتزم وساعات بقى لما تزنق معاه قوى يقولها "انى احبك جدااا فى الله" شوفتو بقى كلمة "فى الله" اللى لازقينها دى!! طيب عايزين يحبوا بعض مع الف سلامة بس مايتمحكوش فى الدين بقى . ماتقولها صراحة وخليها ع المكشوف اشمعنى فى الله يعنى ..يقولك علشان كدة يبقى ثبــّـت البنت يعنى ..هى هتقولة عيب لية مثلا دا حتى بيقولها فى الله ولو اعترضت بقى يقولها دة الرسول لما كان الصحابى واقف جنبة ومر رجل تانى من امامهم فقال الصحابى انى احب هذا الرجل فى الله فقال لة رسول الله "وهل اخبرتة قال لا، قال فاذهب واخبرة "
وانا دلوقت باخبرك ياحبيبتى فى الله.

وبعدين يجى يقولها لو غابت كام يوم عنة ماكلمتوش ع الماسينجر "انتى غبتى فين؟؟ دا انا قلقت عليكى قوى والله ! " .. طيب ممكن اطلب منك طلب لو سمحتى .
شوفوا الادب بقى! شوفو الادب واتعلموا فالبنت تقولة : اتفضل....بنت مؤدبة ....مؤدبة يعنى !! يقولها اية بقى؟؟

ممكن رقم تليفونك علشان لو غبتى اقدر اطمن عليكى مش اكتر صدقينى وممكن كمان نبقى نصحى بعض لصلاة الفجر ...ونعين بعض على قيام الليل ولو مش عايزة خلاص براحتك واعتبرينى ماقولتش حاجة ...ودى حريتك وانا بحترمها جدا !تقوم البنت برضة تكابر وتقاوم فى البداية ....وتقولة حرام يقولها هبعتلك رسايل بس ! مش هاتكلم صدقينى تقولة اااة .... لو رسالة بس ...ماشى وتلاقية تانى يوم بيتصل بيها اذا ماكنش فى ساعتها ويبدا اخونا بقى فى النحنحة نحانيحو نحانيحى .

ولو اعترضت البنت برضة يقولها : يعنى انت مش بتكلمى البياع اللى بتشترى منة مثلا... مابتطلبيش طلباتك من السوبر ماركت بالتليفون ولا اية ... ولو البنت كابرت برضة بصوا بقى للكلمة اللى جاية دى لو زنقته يعنى وجابتلة حديث ولا اية بتعارض اللى بيقولة ، فيقولها اية استفتى قلبك يا سلام سلم ع اللى بيتكلم، استفتى قلبك يا حنين ! يقولها ماهو قلب المؤمن دليلة ...وانا قلبى دليلى على راى ليلى مراد.

وبرضة لان هوى البنت جاى مع الكلام وكل اعتراضاتها كانت نوع من حلاوة الروح يعنى ضعيفة من اساسة وبتفرفر من الشبكة اللى حوطتها بيها...فتتكلم!! بس بقى ويبقى مش فاضل غير انة يكلمها ع الكاميرا او يشوف صورتها وكدة بقى بحجة برضو: مش عايزة تشوفى اخوكى شكلة اية ؟؟ ممكن اشوف اختى شكلها اية؟؟

ماهما اساسا اخوات فى مين؟؟ فى الله ...فى الله ، اوعوا تنسوا....

ويكمل بقى : احنا اتفقنا ان احنا اخوة فى الله يعنى ماتخافيش منى دة انا اخاف عليكة اكتر من نفسى وهكذا دواليك ..وبعدين تقع فى حب اخوها فى الله .. وتتعلق بية.. والله اعلم هيقف الموضوع لحد كدة ولا هيكمل فى سكك تانية وفى جميع الحالات نهاية السكة دى غالبا بتبقى "امك فى العش ولا طاااااااااااااارت"

وتتفاجا بقى ان صاحبنا مش حاططها فى دماغة اصلا....... وكان مجرد بيلعب بيها وبعشرة زيها وجواز مين يا ماما اللى بتقولى علة ...انا مااتجوزش واحدة كلمتها ع الماسينجر وكلمتنى . ما اللى يخليكى تعملى كدة معايا هاتعملية مع غيرى ولو واجهتة بالكلام بتاعهم الاولانى يطلع نفسة زى الشعرة من العجين وتطلع البنت فى الاخر هى اللى فهمت قصدة غلط وانة ماكانش يقصد ... وان تفكيرها سطحى وبتسئ الظن بالناس وانة غلبان وطيب وعارف ربنا ... وانها بتفترى علية منها لله

كتابة \ خديجة صاحبة مدونة مين فى الحياة مرتاح

__________________

[wedad]

سبحان الله

تسلسل فظيع بين الاتنين

يبدوأ بالحب في الله

وبعد كده البنت هي إلي تقع في الفخ

والولد زي ما بيقولوا بيطلع نفسه زي الشعرة من العجين

مشكووووووووورة حبيبتي على نقلك لنا هذا الموضوع

فعلا مفيد جدا

تسلم يديكِ

ولا تحرمينا من جديدك

[drrasha]

شكرا عزيزتي وداد علي مرورك الكريم وتعليقك علي موضوعي

جزانا الله وايكم الخير

وجمعنا الله في محبته

[المحبه لله]

موضوع رااااااااااااااااااااااااااااااااااااااااااااااااا اائع جداااااااااااااااااااااااااااااااااا
اللهم قنا الفتن ماظهر منها وما بطن

جزاكى الله كل خير اختى الحبيبه دكتوره رشا

[drrasha]

جزانا الله واياكم كل الخير حبيبتي المحبه لله

لا تحرمينا من مشاركاتك

تقبلي تحياتي............................. شكرا

[دعاء]

السلام عليكم ورحمه الله وبركاته
فعلا هذا اللي بيحدث في الواقع
ويحدث اشياء لا تحمد عقباه
انصح اخواتي ان يخافوا علي انفسهم وان يرقبوا الله في اعمالهم
ويسالوا انفسهم هل هذا العمل يرضي الله طبعا الجواب لا
اللهم ردنا الي الاسلام ردنا جميلا
جزاك الله خيرا اختي

[drrasha]

اقتباس: المشاركة الأصلية كتبت بواسطة دعاء    السلام عليكم ورحمه الله وبركاته فعلا هذا اللي بيحدث في الواقع ويحدث اشياء لا تحمد عقباه انصح اخواتي ان يخافوا علي انفسهم وان يرقبوا الله في اعمالهم ويسالوا انفسهم هل هذا العمل يرضي الله طبعا الجواب لا اللهم ردنا الي الاسلام ردنا جميلا جزاك الله خيرا اختي

جزانا الله واياكم كل الخير اختي العزيزة دعاء

شكرا علي مرورك الكريم

لا تحرميني من مشاركاتك

[sawsan]

بارك الله فيك تقريبا هذه الحكاية تحدث فى اغلب الاحوال بنفس تفاصيلها مع بعض مرتادى المنتديات ولاحول ولاقوة الابالله

نعم نقول انهم يبدئون بقال الله وقال الرسول وبعد ذلك تتدرج الحكايات للظروف والاحوال وبعد ذلك يحدث ما لايحمد عقباه

اثقل الله ميزان حسناتك بصالح اعمالك لهذا التنبيه الذى ما احوج البنات والشباب له حتى لايقع بهم الشيطان فى الخطاء وهم يحسبون انهم يحسنون صنعا

دمتى بكل خير يارب

[drrasha]

اختي العزيزة سوسن

شكرا علي مرورك بموضوعي

وأقول لكي بالفعل هذه السيناريوهات التي يدخل بها بعض الشباب علي البنات

وللاسف الشديد يحدث بعض من هذه السيناريوهات في بعض المنتديات الاسلامية

ومن بعض الاعضاء الذين يقال عليهم ملتزمين

كفانا الله واياكم شر الفتن

[elmrwany]

لاحول ولاقوة الا بالله
الدين اصبح وسيله رخيصة هكذا
موضوع خطير وخدع احسب الكثير يمكن ان تنطلى عليه
وأرجو من مشرف الغرفة بتثبيته